MAYORIDAD na an nagsabi. Si Gobernador LRay Villafuerete giraray an pinili bilang Chairman o pamayo kan Regional Developmant Council sa kabikolan.

Sa ginibong General Membership Election Conference kan Regional Development Council sa National Economic Development Authority (NEDA) Regional Office Conference Center sa Legaspi City, Albay, pinagborotohan asin pinili giraray si Gobernador Luis Raymund Villafuerte Jr. kan provincia nin Camarines Sur bilang RDC Chairman sa ikaduwang termino sa eleccion na ginibo kasoodma, Agosto 14.

Enterong ipinaheling kan mayoridad na miembros kan RDC an saindang suporta ki Gobernador LRay Villafuerte kan pagborotohan sa plenaryo kun siisay talaga an saindang pinagmimirar na karapat-dapat mamayo sa RDC na sobra sa noventa porciento (90%) kan voting members kan Council an pinagpili an gobernador kan Camarines kaysa sa gobernador kan Albay na si Gobernador Joey Salceda.

Sa resultado kan botohan, nagluwas na si Gobernador LRay nakakua nin 38 boto samantalang si Gobernador Joey Salceda puminorot sana nin 6 na boto, harayo pa sa kabanga kan nakuang boto kan dati naman na RDC Chairman.

Bago pa man an pirilian, risa na an dakulang comfiansa kan mayoridad na miembros kan RDC sa guminanang Chairman, asin ini pinatunayan kan mismong an mga gobernador sa kabikolan an nangenot tangani maasegurar na si Gob.Villafuerte an giraray magdanay na pamayo sa RDC- Bicol huli ta mismo si Gobernador Elsa Olga Kho kan provincia nin Masbate an nagnominar saiya asin ini sinegundahan pa ni Gobernador Jesus Typoco kan provincia nin Camarines Norte.

An kapangganahan kan Gobernador kan Camarines Sur repleccion kan mga naginibo asin pinatunayan na kan gobernador sa pagtukaw kaini bilang Chairman kan enot pang termino sa kadakol-dakol na acompliciemento arog kan pagdagdag fondo kan Bicol-RDC na itinao ni Presidente GMA huli sa saiyang maigot na inisyatibo.

Sa paninindugan ni Gob LRay na ibariwas an ano man na maninigo para sa kabikolan, nagibo niya na mapoonan man an iba-ibang ideya sa pagpapauswag kan rehiyon arog na lang sa pag-krear kan Southern Luzon International Airport na igwa na nin inisyal na pag-urulay sa foreign funding agencies asin an Luzon Transport Master Plan na matakod asin madolot nin marikas na-pag-asenso sa kabikolan.

Katakod kaini, nahorar man bilang Private Sector Chairman asin Co-Chairman sinda Nicolas Beda Priela kan Camarines Sur-Naga City asin si Fr. Casas kan provincia nin Masbate na matukaw bilang counterparts ninda Gob. LRay Villafuerte bilang Chairman asin Gob.Joey Salceda bilang Co-Chairman para sa Government Sector. (Trebb Gomez/KayleeSanJose)